Paasfees is verby. Die groot oomblik van die kruis en die leë graf lê nog vars in ons gedagtes. Maar nou kom ’n ander soort tyd: ’n wagtyd. Die 40 dae van Jesus se Opstanding tot Hemelvaartsdag (14 Mei) en 10 dae verder tot Pinkster (24 Mei).

Dit is nie net kalenderdatums nie, dit is ’n tyd wat ons help om die volle betekenis van Jesus se werk te ontdek: Hy het opgestaan, Hy regeer, en Hy stuur sy Gees.

Hierdie is ’n tyd waarin ons weer vra: Wat beteken dit dat Jesus werklik leef? En wat verander dit in my lewe, hier en nou? Hierdie Kruispad-uitgawe wil jou juis in daardie wagtyd ontmoet.

Elke artikel vat een deel van hierdie groot waarheid vas: dat Jesus leef – en dat dit alles verander. Van hoop in teleurstelling, tot ’n ewige toekoms, tot die werklikheid van die Heilige Gees wat in jou werk.

Moenie hierdie artikels net lees en aanbeweeg nie. Lees dit stadig. Vat een op ’n slag. Gaan kyk die Bybelgedeeltes self. Dink daaroor. Bid daaroor. Laat dit jou eie lewe begin raak.

Mag hierdie artikels jou help om dieper te sien en verder te kyk as net jou omstandighede, maar na die ewige wat Jesus vir ons kom voorberei het.  

Tot volgende maand,
Wilna Myburgh
Kruispad-redakteur