Hoe en wat dink jy oor die koninkryk van God? In die Evangelies lees ons op byna elke bladsy van die koninkryk van God. Die onderwerp van Jesus se heel eerste preek, toe Hy met sy openbare prediking begin het, was: “Bekeer julle, want die koninkryk van die hemele het naby gekom.”



As Jesus preek, dan bring Hy die boodskap van sy koninkryk. Dit is die kern van Jesus se verkondiging. Jesus se gelykenisse gaan oor die geheimenisse van sy koninkryk. Lukas 8:10 maak dit duidelik. As Jesus ons leer om te bid, wat beveel Hy ons onder andere? Dat ons moet bid: “... Laat U koninkryk kom,” (Matteus 6:10).

En vir ons wat ons bekommer oor wat ons sal eet en aantrek sê die Here: “soek eers die koninkryk van God en sy geregtigheid, en al hierdie dinge sal vir julle bygevoeg word,” (Matteus 6:33). Jesus word gekruisig en wat staan daar profeties bo-aan die kruis geskrywe? “Jesus, Koning van die Jode!"



Toe Jesus opgestaan het uit die dood en opgevaar het na die hemel het Hy sy apostels agtergelaat. In Handelinge 19:8 lees ons: “Paulus het drie maande lank met vrymoedigheid in die sinagoge geredeneer oor die koninkryk van God en die mense daarvan probeer oortuig.” Dit is baie duidelik: ons moet deurentyd en altyd gemoeid wees met die koninkryk van God. Ons moet, inderdaad in die woorde van ons Here, die koninkryk van God soek.



Ds. Marnix Boersema (Gereformeerde Kerk Graaff-Reinet)